كۆچی دوای مامۆستا ( صلاح الدین محمد یوسف) بەڕێوەبەری پێشوتری لقی سلێمانی رابیتەی ئیسلامی كورد (1992 ـــــ  2007  )



بۆلای پەروەردگار گەرایتەوە كۆچی خێرت بێت
كۆچی دوای مامۆستا ( صلاح الدین محمد یوسف) بەڕێوەبەری پێشوتری لقی سلێمانی رابیتەی ئیسلامی كورد (1992 ـــــ 2007 )
ڕۆژی 3 / 11 / 2017 شۆڕەسوارێكی تری بواری كاری خێرخوازی و ئاوەدان كردنەوە و فریاگوزاری رۆحی پاكی دای لەشەقەی باڵ و بۆلای پێغەمبەران و شەهیدان و صالحان گەرایەوەو دونیای فانی بە جێ‌ هێشت و پێشمان كەوت ، خوا لێت خۆش بێت و پلە و مەقامت بەرزتر بكاتەوەو لە فیردەوسی باڵادا كۆمان بكاتەوە.ئامین.
- صلاح الدین محمد یوسف،لە دایك بووی 1962، دەرچوی كۆلێژی پەروەردە بەشی كیمیایە.
- لە ساڵی 1992 لە لقی سلێمانی رابیتەی ئیسلامی كورد دەس بە كاربووە.
- بەرپرسی بەشی كارگێڕی بووە.
- ساڵی 2004بووە بە بەڕێوەبەری لقی سلێمانی تا كۆتای ساڵی 2007 بەردەوام بووە.
- لە كۆتای 2007 دا داوای بەخشینی كردوە لە پۆستەكەی ، دواتر بە پیشەی مامۆستا لە ئامادەیی پیشەسازی بەكرەجۆ دامەزراوە .
- لە ماوەی كاركردنیدا لە رابیتەی ئیسلامی كورد بەشداری كردوە لە بەڕێوە بردن و سەرپەرشتی كردنی هەزاران پڕۆژەی ئاوەدان كردنەوە (دروست كردنی مزگەوت ،پڕۆژەی ئاو ، بنكەی تەندروستی ، قوتابخانە ،) هاوكاری هەزاران خێزانی هەژار و نەدار منداڵی بێ‌ باوك و گەیاندنی هاوكاری و پڕۆژەی فریاگوزاری لە تەواوی شار و شارۆچكەكانی سنوری پارێزگای سلێمانی كردوە .
- بە دڵسۆزی و لێبڕانەوە ئەركی سەرشانی ئەنجام داوە و بڕواو متمانەی بە پاداشتی نەبڕاوەی یەزدان هەبوو بۆ هەمو ئەو كارانە
- بە ئەمانەت و دڵسۆزیەوە هەمو ئەو ئەمانەت و كەل و پەلانەی رادەستی دامەزراوەی رابیتە كردەوە كە لە كاتی ئەرك و مەسئولیاتدا لەبەر دەستی بوو .
- پێش نزیكەی دوو مانگ لە كۆچی ماڵئاوایی ، خوای گەورە بە جەرگ سوتان و مەرگی كچە تەمەن 11ساڵانەكەی تاقی كردەوە و زۆر هیمەت بەرز و خۆ ڕاگر بوو ئیمان دارانە لەو تاقی كردنەوەدا مامەڵی دەكرد ، وانەی صبر و ئارام گری بە كردار پیادە دەكرد .
- دوای ململانێ یەكی زۆر لەگەڵ نەخۆشی و دووجار ئەنجام دانی نەشتەرگەری بەرەبەیانی ڕۆژی 3/11/2017 لە نەخۆشخانە ڕۆحی پاكی بۆ بارەگای پەروەردگار گەڕایەوە .
إنالله وإنا إلیه راجعون
دەستەی كارگێڕی باڵای رابیتەی ئیسلامی كورد
4/11/2017      







           
دواتر
« Prev Post
پێشتر
Next Post »
سوپاس بۆ كومێنته‌كه‌ت