لقی سلێمانی ڕابیتەی ئیسلامی كورد بەهاوكاری خێرخوازانی كوردستان 322 سەر قوربانی ئەنجامدا.

لقی سلێمانی ڕابیتەی ئیسلامی كورد
بەهاوكاری خێرخوازانی كوردستان 322 سەر قوربانی ئەنجامدا
نزیكەی 5000 خێزان لێی سودمەند بوون
ماوەی دوو هەفتە بەرلە جەژنی قوربانی پیرۆز، رابیتەی ئیسلامی كورد چەند ریكلام و بانگەوازێكی لەدەزگاكانی راگەیاندن و سۆشیال میدیاوە بڵاوكردەوە بەمەبەستی ئەنجامدانی قوربانی، بۆ ئەوكەسانەی دەیانەوێت قوربانی بكەن دەتوانن لەرێگەی لقەكانی رابیتەوە لەهەر چوار پارێزگاكەی هەرێمی كوردستان بری پارەی دیاریكراو تەسلیم بكەن و دواتر دووەم رۆژی جەژن قوربانیەكە ئەنجم دەدرێت و دەتوانن ئامادەبن و چەند بەشێكیش لە قوربانیەكەیان بەرنەوە. ئەم ساڵیش لقی سلێمانی رابیتە پێشەنگ بوو لە ژمارەی قوربانیكردندا، دیارە ئەمەش بەهاوكاری ئەو خێرخوازانەی متمانەیان بە پرۆژەكە هەبووە لە رابیتە ئەنجام بدرێت.
خێرخوازانی كوردستان بەدەم ئەم پرۆژەوە هاتن و تەنها لە لقی سلێمانی رابیتەی ئیسلامی كورد، بڕی پارە بەئەندازەی 322 سەر لەلایەن خێرخوازانەوە تەسلیم بە رابیتە كرا. بۆیە رابیتەش بەئەمانەتەوە لەشەوی دووەمی جەژن هەتا سێیەم رۆژی جەژنی قوربان قوربانیەكەی ئەنجامداو دابەشیكرد بەسەر هەژاراندا.
جەمال محمود بەرێوەبەری لقی سلێمانی رابیتەی ئیسلامی كورد لەلێدوانێكیدا ئاماژەی بەوەدا كە " سەرەرای بوونی قەیرانی دارایی ئەمساڵ خێرخوازان و بەتایبەت خێرخوازانی شاری سلێمانی بەشداریەكی گەرم و گوریانكرد و بەدەم پرۆژەكەوە هاتن."
بەشداربوانی پڕۆژەكە كێ بوون؟
خێرخوازان كە ئەمساڵ لەرابیتەی ئیسلامی قوربانیان ئەنجامداوە، ئەوكەسانە بوون كە ئارەزوومەند بوون لەڕێگای ڕابیتەی ئیسلامی كوردەوە قوربانی كردنەكە ئەنجام بدەن. شەوی دووەمی جەژنی قوربان كە دەستكرا بە قوربانیكردن لە كوشتارگەی شارەزور، بۆ رۆژی دووەمی جەژن بەشە پشكی خێرخوازان ئامادەكراو سەرلە بەیانیەكەی خێرخوازان هاتبوون بۆ لقی سلێمانی رابیتە بۆ بردنەوەی پشكە گۆشت هەتا لەڕێگەی خۆیانەوە دابەشی بكەن. ئەمەش وەك خێرخوازێك كە ئامادەی قوربانیەكەبوو وتی"ئێمە لەنەبوونی متامەنەوە نییە بەرابیتە ئیسلامی كە بەشێك لە قوربانیەكە دەبەینەوە، ئەگەر متمانەمان نەبوایە بەشداریمان نەدەكەد، بەڵكو من خۆم چەند ماڵێكی فەقیر دەناسم كە موستەهەقن بۆیە من بەشێك لەقوربانیەكەی خۆم دەبەم بۆئەوان، ئەوەی تری رابیتەم كردووە بە وەكیل تا خۆیان دابەشی بكەن."
ژمارەیەكی زۆرتریشیان ئامادە نەبوون و لەكاتی تەسلیمكردنی بڕە پارەكە بەرابیتەی ئیسلامی كورد، بەڵكو رابیتەی كردووە بەوەكیل بۆ سەربڕینەكەی و دابەشكردنەكەشی.
سەرگوڵ خانی تەمەن 45 ساڵ یەكێكە لەو ژنانەی كە قوربانی ئەنجامداوە لە لێدوانێكدا وتی"خۆمان نەمانتوانیوە قوربانی بكەین، ئەوان كارئاسانیان بۆ كردوین، خێریان بنوسێت ئەو ئەركەیان لەكۆڵ ئێمە كردەوە، ئەو ئیشەی ئەمان دەیكەن لەم قوربانیەدا قەت بەئێمە ناكرێت."
خێرخوازێكی دیكەش، كە هاتبوو بۆ بردنەوەی بەشە گۆشتی قوربانیەكەی لەلێدوانێكدا سوپاسی رابیتەی ئیسلامی كردو وتی "ئەمە ئاسانكاریەكی زۆرباشە، هەر لەكڕین و باركردن و سەربڕین و پشكنینی پزیشكی، كە ئەم كارانە بۆ ئێمە زەحمەتەو بۆمان ناكرێت."
لەداوی سەربڕین گۆشتەكان پشكنییان بۆ ئەنجامداراوە
لەدوای سەربڕٍین و كەوڵكردنی، حەیوانەكان هەڵدەواسران بەقولاپداو پزیشكی ڤێتەرنەری پشكنینی بۆ چەند ئەندامێكی حەیوانەكە ئەنجام دەدا، وەكو جگەرو سی و زراو..توێكاری دەكرد و لەلایەن پزیشكەكەوە بڕیاری دروستی و نادروستی دەدرا.
دكتۆر سەروەر فاتیح و دكتۆر دڵشاد مستەفا، دوو پزیشكی ڤێتەرنەرین و پشكنینیان بۆ ئاژەڵەكان ئەنجام دەدا، باسیان لەوەكرد پشكنینی پزیشكی بۆ ئاژەڵی سەربڕاو زۆر پێویستە چونكە هەندێ نەخۆشی هەیە لەرواڵەتدا دەرناكەوێت لەو ئاژەڵەدا، بەڵام بەكارهێنانی لەلایەن مرۆڤەوە زیانی كوشندەی لێدەدات. وتیشیان "ئێمە ئەم پشكنینە بۆیە دەكەین تا ئەو گۆشتەی خراپەو گومانمان لێی هەیە، یان سی و جگەرەكان كەتوشی نەخۆشی بوون و خراپن بۆ تەندروستی مرۆڤ، فڕەی بدەین و نەیەڵین دابەشبكرێت."
زۆربەی لەدەرەوەی شار دابەشكرا
بڕی گۆشتی ئامادەكراو لە 322 سەر قوربانی، لەداوی تەواو بوونی قۆناغی یەكەمی قوربانیكردن كەبریتیبوو لە هێنان و سەربڕین و پشكنین و وردكردن، بریتیی بوو لەنزیكەی (6) تۆن گۆشت. كە بە چەند قۆناغێك دابەشكران، كۆمەڵگای بازیان 650 بەش كە بەشێوەیەكی یەكسان ماڵەو ماڵو دابەشكراوە بێ جیاوازی و لێدەركردن، كۆمەڵەی تالاسیما 150 بەش، ئاوارەكانی كەمپی عەربەت 500 بەش، قەرەداغ و قەڵادزێ و سەنگەسەر و بەشێك لە نازداران، سەیدسادق و هەڵەبجەی تازە و خورماڵ و هەڵەبجەی شەهید. ئەمە جگە لەوەی كە خێرخوازانی بەشدار، كە خاونی قوربانیەكەبوون بەشێكیان دابەشكردووە كە زیاتر لە 1000 بەش بووە.



دواتر
« Prev Post
پێشتر
Next Post »
سوپاس بۆ كومێنته‌كه‌ت